S. Ivi : Kim En Joong e chapel Lokmaria-an-hent

E-pad miz Eost 2026 e vez diskouezet oberennoù dispar eus an arzour brudet Kim En Joong (livour ha beleget abaoe pell). Un darzhadenn a livioù kaer e-barzh chapel Lokmaria-an-hent (S. Ivi, bro gKerne).

Lokmaria an hent

« Lokmaria an hent » zo ur vrav a chapel, ma ‘z ‘eus ! Houmañ savet e maen-greun, e XVIvet kantved (abretoc’h c’hoazh evit al lodenn goshañ anezhi). Lec’hiet e-kreizig ar maezioù, war vord an hent kozh roman, etre Gwened ha Kemper - gouzout a reer e veze an hentoù roman treset ha savet war an hentoù kelt koshoc’h c’hoazh -, ur porzh-bered hengounel tro-dro dezhi (karnel ha kalvar), hag ur boked gwez braz e-tal dezhi evit kinnig disheol d’ar weladennerien. Neuze ‘ta, an dra gentañ ha brav amañ a zo anv al lec’h

Dec’h, ar sent kozh

Gant an hini o vont e-barzh e vo meneget al leur diouzhtu : ul leur-douar, pilet ! Tostik ouzh reoù a veze kavet e tier-feurm zo, e Breizh-Izel, betek goude ar brezel diwezhat. Ha da heul, skeudennoù koad sent kozh, livioù-kaer dezhe. Adlakaet int bet en o flas warlene, goude un adneveziñ dindan lagad melestradur ar Savadurioù Istorel (« Monuments historiques »). Sent kozh ? Reoù oadet eus deroù ar Feiz kristen (a-raok ma voe eus hon Breizh) sur a-walc’h, reoù all o vezañ Breizhiz tamm pe damm (pe neuze gwelet e-giz ar vro, evel S. Izidor, bragoù-braz gantañ). Bez e c’heller dre-se kavout un tañva eus ar Feiz kristen er vro, e kantvedoù tremenet.

Hirio, al livioù brav, ouzhpenn

Mes hirio, un dra bennak all a zo ! Un darzhadenn a livioù, ken brav ma 'z eo evel ur gwir vurzhud, evit al lagad hag ar galon. Livioù hag oberoù all gant Kim En Joong.

Setu ar pezh a skriv Gusti Herve, beleg eus ar vro ma teu intrudu an diskouezadeg-mañ drezañ.

« Pep tra zo posubl dirak oberenn un arzour :

. ne lâr netra deoc’h. Chom a reoc’h yen pe digizidik (pe difrom) dirazi.

. posubl eo he gwelout e meur a -zoare. Leuskel a ra oberenn an arzour oc’h unan-penn dirak ho krouidigezh arzel deoc’h-c’hwi.

Pep tra zo posubl hep na vefe ezhomm gouzout petra a fell d’an aozer lâret. Ma ra un arzour un oberenn ha ma c’hinnig anezhi ouzh an holl, n’emañ ket hi dezhañ hepken. Posubl eo d’an oberenn neuze lârout muioc’h, gwelloc’h hag en un doare disheñvel.

Livour, maendreser, priour, hag oberour gwerenn-livet ivez, eo Kim En Joong. C’hoari a ra gant livioù hag al luc’h, evit ezteurel e Feiz dezhañ. »

Hent-vuhez un arzour dispar

Kim En Joong zo bet ganet e 1940 e bro-Korea-Su. Deuet da vezañ livour o kelenn e-barzh ur c’hloerdi e tizolo tamm-ha-tamm ar gristeniezh hag ar Feiz betek dont da vezañ Dominikan e 1967. Beleget eo e 1974. N’en em welout ket e-unan evel ul livour relijiel. « Beleg on ha livour war ar memes-tro. Mes arzh relijiel ne ran ket ». Pal an Tad Kim a zo diskouez e Feiz, war-eeun. (Brezhoneg diwar un notenn gant an Tad Gusti Herve ).

Mignoned ha baleerien, troerien-Breizh, deuit da welout Lokmaria-an-hent !

D’ar sadorn 7vet a viz Eost 2026 e tremen baleerien an « Dro-Vreizh », niverus anezhe, dirak chapel Lokmaria-an-hent. Pa vez o tostaat diwezh un hent a 31 kilometrad. Na chomit ket hep teurel ur sell – ha ma vefe un dornad munutenn nemetken - e -barzh ar chapel. Sur on e vo laouenaet ho taoulagad ha kalon, ken koulz hag e vo ankounac’haet un tamm skuizhder ho taoudroad brevet gant hirder ar valeadenn, dirak splannder oberennoù an arzour deuet eus broioù ar reter pell, savet oberennoù gantañ e pep lec’h war hon voull-douar (Breizh, Bro-C’hall, Europa, hag ar bed a-bezh), koulz ha donder ar Feiz : Kim En Joong.

Gerioù

. porzh-bered: enclos paroissial

. intrudu: initiative

. maendreser: lithographe

. priour: céramiste

. ezteurel e Feiz dezhañ: exprimer sa foi (he Feiz dezhi, pour une femme)

. Troer-Breizh, troerien-Breizh:

E galleg flour, Trobreizhien(s). Nom choisi par l'association « Les chemins du Tro-Breiz »

. Tro Breizh, an Dro Vreizh:

Ne c’heller ket lakaat e galleg an anv-se, deuet betek ennomp a gantved da gantved ! Anvet ivez, gwechall gozh, pelerinaj ouzh ar seizh sant (Malo, Brieg, Tudual, Paol, Samsun, Pater, Kaourintin), ma vez gwriziennet don warne hon bro a Vreizh.

Doare-skrivañ

. Breizh (peurunvan)

. Breiz (skolveuriek)

Liammoù

« Les chemins du Tro-Breiz » . Lec'hienn ar gevredigezh.

Tro.bzh Lec’hienn diwar-benn istor an Dro-Vreizh / site sur l’histoire du Tro-Breizh .

Aviel d’ar sadorn 7vet a viz Eost 2026 (bloavezh A): Mz 16, 24-28

. 1. Gwelout ar fotoioù, evit diskoachañ an destenn e brezhoneg. Daou embannadur a zo kinniget.

. An Testamant Nevez - Kelou Mad Jezuz or Zalver. Nouveau testament complet, avec photos. Edition soignée pour la liturgie (Nihil Obstat, Imprimatur 2002). Traduction bretonne sur le grec: Pierre Guichou. Editions Minihi Levenez. (2002). Graphie skolveuriek. Evangile du 7 aout 2026 (année A): Mt 16, 24-28

. Ar Pevar Aviel. / Les quatre Evangiles. (Nihil Obstat 1968, Imprimatur 1969). Traduction bretonne sur le grec: Maodez Glanndour. Editions Al Liamm (1982). Graphie peurunvan. Evangile du 7 aout 2026 (année A): Mt 16, 24-28

.2. Gwelout ivez lec’hienn (www.diocese-quimper.fr) Eskopti Kemper ha Leon Graphie skolveuriek.

Evit sizhunvezh a-vremañ (2-8 Eost 2026), choazit an triwec'hvet sizhunvezh (bloavezh A) / Pour la semaine Tro Breizh 2026, choisir la dix-huitième semaine (année A)

Kemper ha Leon

Notenn: gouestlet eo ar pennad-mañ da Gusti Herve, da Kim En Joong, ha d’an Intron Varia en deus roet din ar fiziañs evit splujañ e bed ar brezhoneg (pell zo dija. E bro Durki, Efez-Kusadasi, e oa). JL LF